هەواڵ‎ > ‎

جوڵەیەكی دیكەی زانكۆی سلێمانی بۆ روبەڕوبونەوەی كۆرۆنا ڤایرۆس

راگەیاندنی كۆلێج:

"لە (جی ئای ئێس) و (ڤی تی ئێم)ەوە بۆ دروستكردنی مادەی پاكژكەرەوە" زانكۆی سلێمانی لە هەوڵەكانی ناوەستێت بۆ هاوكاریكردنی دەزگا تەندروستییەكان لە روبەڕوبونەوەی كۆرۆنا ڤایرۆسدا.

لەنوێترین دەستپێشخەریدا، زانكۆی دایك بڕێكی زۆر لە مادەی پاكژكەرەوە "تعقیم" ئامادە دەكات و پێشكەشی لایەنە تەندروستییەكانی سلێمانیی دەكات.
مادە پاكژكەرەوەكە لە تاقیگەكانی كۆلێجی دەرمانسازی و بە هاوكاریی دەزگای مرۆیی مام دروست دەكرێت. مامۆستایان و شارەزایانی زانكۆكە پشكی شێریان لە بەرهەمهێنانیدا هەیە.

لەگەڵ بڵاوبوونەوەی كۆرۆنا ڤایرۆس لەهەرێمی كوردستاندا، زانكۆی سلێمانی لیژنەیەكی باڵای بۆ روبەڕوبونەوەی ئەو پەتایە دروست كرد و تاكو ئێستایش لەچەندین رووەوە هاوكاریی دەزگا تەندروستییەكانیان كردوە. هەر لە پرۆژەی "جی ئای ئێس"ەوە كە تایبەت بوو كۆكردنەوەی زانیاری و داتای توشبووان تاكو دەگات بە دروستكردنی مادەی "ڤی تی ئێم" كە لە پشكنینەكانی ڤایرۆسەكەدا بەكاردێت.

كۆرۆنا ڤایرۆس یاخود "كۆڤید19" مانگێك زیاترە ژیانی لە هەرێمی كوردستاندا پەكخستووە و نەیهێشتووە دەرگای ناوەندەكانی خوێندنیش بكرێنەوە. لە ئێستایشدا لایەنە تەندروستییەكان ئاماژە بەوەدەكەن رێكارە تەندروستییەكان و قەدەغەی هاتوچۆ رۆڵی گەورەیان هەبووە لەوەی تاڕادەیەكی باش كۆنتڕۆڵی دۆخەكە بكرێت. زانیارییەكان ئاماژە بەوەدەكەن پێدەچێت لە دوو بۆ سێ هەفتەی داهاتوودا "سەركەوتن" بەسەر ڤایرۆسەكەدا رابگەیەنرێت ئەگەر بێتوو پابەندبوون بە رێنماییەكانەوە بەردەوام بێت.

Comments